हैदराबादेत बॉंब फुटले
ग्रीस मधे लागली आग
गोन्सालिसने राजिनामा दिला
पाकिस्तानला आलाय राग
रीडिफ़ डॉट कॉम ला सिनेमाचं वेड
ई-महाराष्ट्र टाइम्सचे मराठी वॉलपेपर
आऊटलुकवर उच्चभ्रू चर्चा
प्रत्येकाचे आपापले आवडते ई-न्यूजपेपर।
फिरणाऱ्या पृथ्वीसारखं गरगरतंय डोकं
कळेना आता मी स्वयंपाक करू काय ?
ग्लेशियर वितळतोय, ओझोन संपतोय
ग्लोबल वॉर्मिंगवर शोधायलाच हावाय उपाय!
माहिती तंत्रज्ञानाचं हे युग
कळायला लागल्यात दुनियाभरच्या सुरस चमत्कारिक कथा
पण शेजारणीला ताप आला, बाहेर बर्फ, ही घरी एकटी,
तिची कोणाला दिसत्येय व्यथा?
किंवा असेल बुवा गुगलचं नवीन सॉफ्टवेअर,
आकाशातून आजाऱ्यावर झूम करणारं
रेड-क्रॉसला थेट संदेश पोचवणारं
गूगल तर आता आमचा देवच झालाय
वाट दाखवणारा, लाखो गोष्टींचा "शोध" घ्यायला
प्रवृत्त करणारा...
पण आज त्या गोष्टी आपल्या अंतर्मनात उरलेल्या नाहीत-
त्या आहेत Webshots, Blogspot, Orkut वर कुठेतरी.
आज त्या तंत्रज्ञानाने, मलाही केलंय
माहितीचं निव्वळ एक केंद्र-
० १ ० १ ० १ आकड्यांमधून बोलणारं, ऐकणारं.
शेकडो वर्षांपूर्वी शेक्सपीयर म्हणाला होता,
All the world's a stage!
आपण तेव्हाही बाहुल्याच होतो,
आताही बाहुल्याच आहोत
फक्त आपली बोटं बांधलीयेत आज माऊसला
"क्लिक-कर्ता, करविता आपणच आहोत"
अशा गोड भ्रमात!