मातीमाय

स्वच्छ पांढऱ्या फ्लॉवरची

खुडलेली देठं

भेगेत मिटून ठेवलेलं

गव्हाचं गुपीत

मातीतुनही मेथीचे हिरवे

कोवळे कोंभ

हे जीवन सुंदर आहे.

तडतडणाऱ्या मोहरीच्या तालावर

थुईथुई नाचती मिरची बघतांना

पिवळ्या हळदीवर हिरवे मटार

कुंचले झाले जगतांना

दुपारचा चहा, खारी बिस्कीटं

चिवडयातला कुरकुरीत कढीलिंब

ओल्या नारळाचा चरबरीत गोडवा

भातावर तुपाची सोनसळी धार

श्रीखंडातल्या केशरागत

क्वचित मुरलेल्या स्वप्नांची

तीट लागली जन्माला

टम्म फुगल्या पोळ्यांची

तिने दिलेला जन्म चाखतो

रोज दिवाळी घरोघरी

हवे आणखी काय मनाला?

उद्या मिळावा आजपरी...